Bibliotecas Mutantes
Un proxecto de animación á lectura no medio rural inspirado no movemento internacional Little Free Library
Pequenas casetas de intercambio de libros, feitas a man en madeira de castiñeiro, instaladas en concellos rurais para que ler e compartir sexa cousa de todas.
Alianza pola lectura no rural
Que é unha Biblioteca Mutante
As Bibliotecas Mutantes son unha iniciativa de Outonía Coop en alianza cos concellos que promove a lectura no medio rural. Seguindo o modelo das bibliotecas libres, instálase un dispositivo onde calquera persoa pode deixar ou coller libros, sen máis normas que o coidado compartido.
A responsable de cada caseta é toda a veciñanza: quen deixa os libros que máis lle gustaron para compartilos, quen deixa os que non lle convenceron pensando que a outra persoa si os vai gozar, e quen simplemente pasa a mirar se hai algo que lle apeteza levar.
A rede
Dende o seu inicio en 2024, a Rede de Bibliotecas Mutantes medrou ata sumar hoxe 8 concellos rurais de Galicia e Zamora. Unha proposta pioneira que integra estas localidades no movemento internacional das Little Free Library.
Como funciona?
Dispositivos autoxestionados, para todas as idades, sen horarios e coidados de xeito colectivo.
Colle e deixa
Podes coller un libro e deixar outro, só deixar, ou só coller.
Para todas as idades
O tamaño está pensado para que as crianzas cheguen tamén a elas.
Sempre aberta
Non ten horario nin chave: ao teu dispor a calquera hora.
Coidado colectivo
É responsabilidade de toda a veciñanza mantela viva e coidada.
Cada dispositivo está feito a man por Miguel, carpinteiro de Manzaneda, en madeira de castiñeiro con teito de cobre. Buscamos un deseño que se integre na paisaxe: bonito, coidado e adaptado tamén a persoas con mobilidade reducida.
O que inclúe o proxecto
Todo o necesario para que a túa aldea conte cunha biblioteca mutante: desde a instalación até a presentación e a dotación inicial de libros.
Instalación do dispositivo
Adaptado a crianzas e persoas con mobilidade reducida, feito en carpintaría local
Panel informativo
Un panel pedagóxico e atractivo que explica o funcionamento da biblioteca
Obradoiro de animación
Presentación aberta ao público en xeral
Dotación de libros
Libros actuais para dinamizar o dispositivo dende o primeiro día
Difusión en redes
Material de divulgación da iniciativa e da participación do concello
Mapa da rede
Integración da localización no mapa dixital da Rede de Bibliotecas Mutantes
Queres unha no teu concello?
Que che parece a idea?
Envíanos unha mensaxe cos teus comentarios para que os poidamos ter en conta para futuros proxectos!
Quen somos?
Outonía naceu co fin de xestar proxectos educativos desde e para os territorios rurais, fiando realidades e propostas a través dos feminismos, a sustentabilidade rural e o respecto pola memoria e o patrimonio inmaterial das nosas comarcas.
Outonía nace coma esa primeira herba que inunda os prados de riqueza e alimento despois da sequía do verán, con forza e moita vida. Outonía tamén é tempo de outono, un tempo no que as casas labregas se enchen de provisións para pasar o inverno.
Outonía son todos os proxectos e ideas que están por vir.